خمس علامات تعرف بيهم شخصية المحاور

ازاي تعرف ان الشخص اللي بتتعامل معاه من نمط المحاور 

ENTP شخصية 

  أولًا مكدبش أبدًا اللي سماها المحاور ، واحنا كمصريين بنقول عليه "بالع راديو" 😂 بس الحقيقة ان دي صفة ليها 

 طبعًا مميزاتها وعيوبها ، يعني مثلًا مشكلته انه ساعات مبيقدرش ان اللي قدامه مش على استعداد كافي للحوار الطويل العريض اللي هيتفتح 

عالهامش كدة ، بتلاقيه بيحب يجيب وجهات النظر ويتبدالها كدة مع الناس ويشوف إيه وجهات نظرهم هما كمان  فهتلاقيه ممكن يقولك عكس اللي هو مصدق بيه في بعض الأحيان لمجرد إنه يشوف دماغك فيها إيه، فحضر نفسك عشان مع شخصية المحاور انت هيتلعب في دماغك  جامد، هو عمومًا بيحب اللي يبداله الحوار ويشوف منه وجهات نظر مختلفة عنه ، كونك بتتجنب الجدال مثلًا فعايز توافقه وخلاص ده مش هيخليك تكسبه، عايز حد دماغه مختلفة عنه توريله حاجات جديدة هو مش شايفها  

ياما يا عيني ناس اتسحبت بالساعات منعرفش نطلعهم من دوامة الحوار اللي دخلوا فيها مع شخصية المحاور ،لكن لأن العضلة الأكثر  استخدامًا عندك هي الأقوى ؛فعضلة التحاور وكسب الجدال هي الأقوى على الإطلاق عند الشخصية دي عن باقي الأنماط ، كل اللي عليه  يعمله عشان ميخسرش اللي بيحبهم انه يختار الوقت المناسب ويلاحظ إنه في أوقات كتير كسب الأشخاص فيها أهم من كسب الجدال  

ثانيًا هتلاقي شخصية المحاور متحبش أبدًا تشبه غيرها من الناس فهتلاقيه دايمًا ماشي على مقولة ودنك منين يا جحا ،تحس إنه يجراله حاجة أو يمرض لو عمل الحاجة زي ما باقي الناس بتعملها 😂،مع ذلك هتلاقيه شخص ذكي جدًا يعرف يجيب التايهة وبيفهم في حاجات كتير عن الحياة والأشخاص

ثالثًا رغم كونه جلنف عاطفيًا _معذرةً يا محاور_ و بيدي الكلمة للي قدامه ومبيقدرش انها ممكن تجرحه إلا إنه فيه نوع من الرومانسية  الظاهرة عليه ونسبيًا بيقدر يفهم اللي قدامه حاسس بإيه عن أنماط تانية شوية مبتقدرش تفهم ده ،فخلينا نقول إنه بيقدر يفهم مشاعر الناس لكن ده مبيمنعوش انه يقول اللي شايفه مهما كان أثره على اللي قدامه

ومن الحاجات غير المتوقعة في شخصية زي دي إنها بتقدر تحسسك إنها فهماك وفاهمة مشاعرك كويس رغم إنها متحطتش في موقفك  قبل كدة لو بتفضفض معاه مثلًا ، وده برضو يخليه يقدر يتلاعب عاطفيًا بالناس ويقدر يعمل ده تعمدًا وجايز بهدف التحدي مش أكتر، لكن والله نمط غلبان مبيحبش يتقل على حد لو في علاقة عاطفية فمبجرد ما الطرف التاني يحب ينهي العلاقة هينهيها تمامًا من غير كلام كتير رغم طبعًا تأثره عاطفيًا بالتجربة 

 رابعًا هتلاقيه شخص بيحب الخيارات المفتوحة بياخد وقت في حياته لغاية ما يقرر الطريق اللي عايز يسلكه ، لكن ده بيخليه شخص متعدد المعرفة والمواهب في أغلب الأحيان 

خامسًا يا سيدي مش أهم حاجة عنده هو الصح والغلط من وجهة نظر الناس، بتلاقيه مهتم أكتر بـ "إيه اللي بينفع في الحياة من الآخر كدة ؟ " إني مثقش في حد مثلًا ؟ .. فهتلاقيه ميثقش في حد ولو عايز يعلمك حاجة فهيعلمك متثقش في الناس زيه.. ده طبعًا على سبيل المثال ومش معناه أبدًا إنه مبيعملش الصح لكن هو لازم يوصله بطريقته الخاصة 

كلامنا اللي قد يبدو إنه هجومي لشخصية المحاور ميمنعش إننا نقول رأينا بإنصاف برضو ، فالحق يتقال في شخصيات بتقدر إنها لما تشوف من نفسها عيب بيخسرها الناس اللي حواليها بتقدر تغير منه ، أكتر حاجة شخصية المحاور تقدر تغيرها في نفسها وتكسب الناس بيها هو تنيمته لكذا جانب من جوانب الذكاء العاطفي، وفي بالفعل من أشخاص المحاوريين اللي بتكون ملهمة جدًا وبتساعد الناس بمقدرتها العالية وبتقدر تخلق الود في العلاقات بينها وبين اللي حواليها فهنيئًا للي قدر يعمل كدة لأنه كسب نفسه وكسب كتيير من قلوب  اللي حواليه 

 وعشان الصورة تبقى أكثر وضوحًا فمن شخصيات المحاور المصريين هو غالبًا أحمد الغندور المعروف بالدحيح والممثل المصري  خالد الصاوي و من المشاهير العالمية ليناردو دافنشي و كذلك القائد العسكري الإسكندر الأكبر